धनकवडीत मध्यरात्री गुंडांचा पुन्हा हैदोस ! 15 रिक्षा, 3 कार, 2 स्कुल बस, टेम्पोची तोडफोडपुणे : दुचाकीवरुन आलेल्या तिघा गुंडांनी धनकवडीत मध्यरात्री पुन्हा एकदा धुडगुस घालत वाहनांची तोडफोड केली. गुंडांनी १५ रिक्षा, ३ कार, २ स्कुल बस आणि एका टेम्पोची तोडफोड केली. त्यांना रोखण्याचा प्रयत्न करणाऱ्या तिघा नागरिकांना त्यांनी मारहाण केल्याने ते जखमी झाले आहेत. त्यांच्यावर रुग्णालयात उपचार करण्यात येत आहेत.धनकवडी परिसरातील केशव कॉम्प्लेक्स, सरस्वती चौक आणि नवनाथ नगर परिसरातील रस्त्याच्या कडेला पार्क केलेल्या गाड्यांवर या गुंडांनी हल्ला केला मध्यरात्री साडेबारा वाजण्याच्या सुमारास तिघे एकाच मोटारसायकलवरुन आले होते. या घटनेची माहिती मिळताच पोलिसांनी घटनास्थळी धाव घेतली. तोपर्यंत हल्लेखोर पळून गेले होते. सहकारनगर पोलिसांनी परिसरातील सीसीटीव्ही फुटेज मिळविले असून त्याच्या आधारे पोलीस हल्लेखोरांचा तपास करीत आहेत.
