पुणे : गणेशोत्सवाच्या पार्श्वभूमीवर पुणेकरांच्या सुरक्षेसाठी पोलीस प्रशासन आणि पुणे मेट्रो पूर्णपणे सतर्क झाली असून, अनुचित प्रकार टाळण्यासाठी आज शहरातील अतिसंवेदनशील आणि वर्दळीच्या महात्मा फुले मंडई मेट्रो स्थानकावर एका विशेष मॉक ड्रिलचे आयोजन करण्यात आले.
गणेशोत्सवाच्या काळात पुण्यात लाखो भाविक आणि नागरिकांची गर्दी होत असते. अशा गर्दीच्या ठिकाणी सुरक्षेचा प्रश्न अत्यंत महत्त्वाचा असतो. कोणताही आपत्कालीन प्रसंग, घातपात किंवा विघातक घटना घडल्यास यंत्रणा किती वेगाने प्रतिसाद देते, हे तपासण्यासाठी या मॉक ड्रिलचे आयोजन करण्यात आले होते.
मॉक ड्रिलदरम्यान सुरक्षा यंत्रणांना आपत्कालीन संदेश मिळताच अवघ्या काही मिनिटांत पुणे पोलीस आणि मेट्रो सुरक्षा यंत्रणा अ‍ॅक्शन मोडवर आली. स्थानकावरील प्रवाशांची सुरक्षित सुटका कशी करावी, तसेच संशयित वस्तू किंवा व्यक्ती आढळल्यास बॉम्बशोधक पथक आणि इतर यंत्रणांनी कशी तात्काळ कारवाई करावी, याचे अत्यंत तंतोतंत प्रात्यक्षिक यावेळी सादर करण्यात आले.
या संपूर्ण सरावामागे आपत्कालीन परिस्थितीत पुणे पोलीस, मेट्रो प्रशासन आणि इतर संबंधित यंत्रणांमध्ये अचूक ताळमेळ आणि समन्वय कसा राखला जावा, हा मुख्य उद्देश होता. कोणत्याही संकटाच्या काळात गोंधळ न उडवता अत्यंत व्यावसायिक पद्धतीने परिस्थिती कशी हाताळायची, याचे धडे यावेळी यंत्रणांनी गिरवले.
या मॉक ड्रिलमध्ये पुणे मेट्रोचे अधिकारी-कर्मचारी आणि पुणे पोलीस दलाचे जवान मोठ्या संख्येने सक्रियपणे सहभागी झाले होते. या यशस्वी सरावांमुळे पुणेकर नागरिक यंदाचा गणेशोत्सव पूर्णपणे निर्भय वातावरणात आणि सुरक्षितपणे साजरा करू शकतील, असा विश्वास प्रशासनाकडून व्यक्त करण्यात आला आहे.